مدرسه ده موعلليم

يئنه دؤيدو اليمدن

باشارماديم فارسيني

ايراد توتدو ديليمدن

 

دئديم: آغا موعلليم

وورما، گؤينه دي اليم

نه دير آخي گوناهيم؟

توركجه دير منيم ديليم

 

ياپيشدي قولاغيمدان

دئدي: بوراخ توركونو

او قالدي ائوينيزده

اونوت گئتسين كؤكونو

 

اؤيره نمه سن آب – بابا

آچاجاقسان اليني

كؤتك يئيه ندن سونرا

اونودارسان ديليني

 

سنين هاران توركدور؟

آذريسن ، آذري

كيم اؤيره ديب دير سنه

بئله يانليش سؤزلري؟

 

آخدي گؤزومون ياشي

تيتره دي ديل – دوداغيم

بئله يالان سؤزلره

اينانمادي قولاغيم

 

آنام مني اويدورماز

آتام مني آللاتماز

بو سؤزلرين هئچ بيري

منيم عاغليما باتماز

 

نييه منيم آديمي 

سوروشمايير اؤزومدن

نييه سؤزون دوزونو

اوخومايير گؤزومدن

 

هركس يالان دانيشسا

آللاهين دوشمانيدير

من كي يالان دئميرم

بو اونون يالانيدير

 

لايلاي دئييبدير آنام

منه بئشيكده توركجه

دانيشميشيق هاميميز

ائوده – ائشيكده توركجه

 

نه دن گرك يازماياق

ديليميزي كيتابا؟

مدرسه ده نه اوچون

گلمه يك بيز حئسابا؟

 

هئچ عاغليما سيغماييرد

نه دير بونون جاوابي

سو يئرينه اوخويام

مدرسه ميزده آبي

 

يقين كؤتك يئمزديم

اوخوسايديم ديليمي

گؤينه رتيدن سيخمازديم

قولتوغوما اليمي

 

قوي بؤيويوم بير اؤزوم

اولاجاغام موعلليم

اوندا چوخ ايش گؤره جك

بو گون گؤينه ين اليم

 

كيلاسيمدان گله جك

ائليميزين اؤز سسي

اولاجاقدير او زامان

توركون ده مدرسه سي

 

بيز واريق وارسا وطن وارايسه دوغما ديليميز

اؤيره نيب بيلمه ليديراؤز ديليني تورك ائليميز

آنا تك جاندان عزيزدير  آنا تورپاق    آنا ديل

حورمتين ساخلا ياشاركن   آنالار قدريني  بيل

وطنين كيمليييدير    وارليغينين      داش تملي

كيملييين بايراغيدير  هر بالانين   دوغما ديلي

آنا ديلدير بزه ين    دويغولارين    اويلاغيني

سوسله ين آرزيلاري سئوگي سئوينجين باغيني

بولبول اؤز دوغما ديليله گوله سويلر  سؤزونو

هر گول اؤز رايحه سيله  تانيدار   اؤز اؤزونو

آنا ديلدير داشييان  لايلالارين    جان داديني

آنا ديلدير ياشادان   ائولادينين اؤز آديني

آنا ديلدير  ائلينين  تاريخي   آيدين تانيغي

يوردونون اؤلكه سينين آيناسي سؤنمز چراغي

آنا ديلده آنانين  سئوگيسي   عطري   دادي وار

آنا ديلده    وطنين   شانلي  شرفلي    آدي  وار

 

سو دئيبدير منه اولده آنام آب كي يوخ

يوخو اويره تدي اوشاقليقدا منه خواب كي يوخ

ايلك دفعه كي چوره ك وئردي منه نان دئمه دي

اوليندن منه دوزدانه نمكد ان دئمه دي

آنام اختر دئمييبدير منه اولدوز دئيب او

سو دوناندا د ئمييب يخدي بالا بوز دئيب او

ال دئيب، دست دئمييب برف دئمييب قاردئيب او

منه هئچ وقت بيا سويله مييب گل دئيب او

ياخشي خاطيرلاييرام يازگوني آخشام چاغيلار

باغچانين گون چيخانيندا كي ايليق گون ياييلار

او دئيردي كي گل باشيوي دارييم اي نازلي بالام

گلمه سن گر باجيوين آستاجا زولفين دارارام

اودئمه زدي كي((بياشانه زنم بر سر تو))

(( گر نيايي بزنم شانه سر خواهر تو))

بلي قارداش داش ياغسادا گويدن سن اوسان منده بويام

وارسنين باشقا آنان واردي منيم باشقا آنام

اوزومه مخصوص اولان باشقا ائليم واردي منيم

ائليمه مخصوص اولان باشقا ديليم واردي منيم

ايسته سن يولداش اولاق بير ياشيياق بيرليك ائده ك

وئريبن قول قولا بيريولدا گئده ك

اولاً اوزگه كولكلرله گره ك آخميياسان

ثانياً  ائليمه ، وارليغيما خور باخميياسان

ايسته سن زور دئيه سن، ملتيمي خوارائده سن

گون گئده ر، صفحه چونر مجبور اولارسان گئده سن

 

منيم آنام

ساوادسيزدير

آديني دا يازا بيلمير

منيم آنام

آنجاق منه

ساي اؤيرديب

آي اؤيرديب

ايل اؤيرديب

ان واجيبي ديل اؤيرديب

منيم آنام

بو ديل ايله تانيميشام

هم سئوينجي

هم ده غمي

بو ديل ايله ياراتميشام

هر شعريمي

هر نغمه مي،

يوخ من هئچم

من يالانام

كيتاب كيتاب سؤزلريمين

مؤلفي : منيم آنام

 

 

مكتبه گئتمه ييب منيم آنام

دوغروسو مكتب گؤرمه ييب

آنجاق آغيزدان آغيزا

قولاق وئريب سؤز اؤگره نيب

***

بيلمم نه سيحيردير اونون

سؤزلري شعرايلن گلر

سانكي صدف صانديغي دير

آغزين آچار اينجي تؤكر

***

تكجه منيم آنام دگيل

نغمه قوشان سؤز يارادان

سانكي بوتون آذر ائلي

شاعير دوغولموش آنادان

 

توركون ديلي تك سئوگيلي ، ايستك لي ديل اولماز

اوزگه ديله قاتسان ، بو اصيل ديل ، اصيل اولماز

اوز شئعريني فارسا ، عربه قاتماسا شاعير

شئعري اوخويانلار ، ائشيده نلر كسيل اولماز

فارس شاعيري چوخ سوزلريني بيزدن آپارميش

( صابير) كيمي بير سوفره لي شاعير ، پاخيل اولماز

توركون مثلي ، فولكلورو دونيادا تك دير

خان يورقاني ، كند ايچره مثل دير ، ميتيل اولماز

آذر قوشونو ، قيصر رومي اسير ائتميش

كسري سوزودور بيربئله تاريخ ناغيل اولماز

پيشميش كيمي ، شئعرين ده گرگ داد - دوزو اولسون

كند اهلي بيلرلر كي ، دوشابسيز خشيل اولماز

سوزلرده جواهر كيمي دير ، اصلي بدلدن

تشخيص وئره ن اولسا بو قده ر زير - زيبيل اولماز

شاعير اولا بيلمزسن ، آنان دوغماسا شاعير

ميس سن ، آ بالام ، هر ساري كوينك قيزيل اولماز

چوخ قيسا بوي اولسان جن كيمي شيطان

چوخ دا اوزون اولما كي اوزوندا عاغيل اولماز

مندن ده نه ظاليم چيخار ، اوغلوم ، نه قيصاص چي

بير دفعه بونو قان كي ايپكدن قيزيل اولماز

آزاد قوي اوغول عشقي طبيعت ده بگه نسين

داغ - داشا دوغولموش ده لي جئيران حميل اولماز

اينسان اودو توتسون بو ذليل خالقين اليندن

آللاهي سئوره سن ، بئله انسان ذليل اولماز

چوخ داكي سارابين سويو ، وارياغ - بالي واردير

باش عرشه ده چاتديرسا ، ساراب اردبيل اولماز

بير ذره مساوات اولا ، شاعر چوپه دونمز

اربابلاريميزدان دا قارينلار طبيل اولماز

دوز واختدا دولار تاختا - طاباق ادويه ايله

اوندا كي ننه م سانجيلانار زنجفيل اولماز

بو(شهريار) ين طبعي كيمي چيممه لي چشمه

كوثر اولا بيلسه دئميرم ، سلسبيل اولماز