توركون ديلي تك سئوگيلي ، ايستك لي ديل اولماز
اوزگه ديله قاتسان ، بو اصيل ديل ، اصيل اولماز
اوز شئعريني فارسا ، عربه قاتماسا شاعير
شئعري اوخويانلار ، ائشيده نلر كسيل اولماز
فارس شاعيري چوخ سوزلريني بيزدن آپارميش
( صابير) كيمي بير سوفره لي شاعير ، پاخيل اولماز
توركون مثلي ، فولكلورو دونيادا تك دير
خان يورقاني ، كند ايچره مثل دير ، ميتيل اولماز
آذر قوشونو ، قيصر رومي اسير ائتميش
كسري سوزودور بيربئله تاريخ ناغيل اولماز
پيشميش كيمي ، شئعرين ده گرگ داد - دوزو اولسون
كند اهلي بيلرلر كي ، دوشابسيز خشيل اولماز
سوزلرده جواهر كيمي دير ، اصلي بدلدن
تشخيص وئره ن اولسا بو قده ر زير - زيبيل اولماز
شاعير اولا بيلمزسن ، آنان دوغماسا شاعير
ميس سن ، آ بالام ، هر ساري كوينك قيزيل اولماز
چوخ قيسا بوي اولسان جن كيمي شيطان
چوخ دا اوزون اولما كي اوزوندا عاغيل اولماز
مندن ده نه ظاليم چيخار ، اوغلوم ، نه قيصاص چي
بير دفعه بونو قان كي ايپكدن قيزيل اولماز
آزاد قوي اوغول عشقي طبيعت ده بگه نسين
داغ - داشا دوغولموش ده لي جئيران حميل اولماز
اينسان اودو توتسون بو ذليل خالقين اليندن
آللاهي سئوره سن ، بئله انسان ذليل اولماز
چوخ داكي سارابين سويو ، وارياغ - بالي واردير
باش عرشه ده چاتديرسا ، ساراب اردبيل اولماز
بير ذره مساوات اولا ، شاعر چوپه دونمز
اربابلاريميزدان دا قارينلار طبيل اولماز
دوز واختدا دولار تاختا - طاباق ادويه ايله
اوندا كي ننه م سانجيلانار زنجفيل اولماز
بو(شهريار) ين طبعي كيمي چيممه لي چشمه
كوثر اولا بيلسه دئميرم ، سلسبيل اولماز